Новый Завет (на цсл., гражданским шрифтом) [Завет Новый] (fb2) читать постранично, страница - 157

показующаго ми сие:

9 и глагола ми: виждь, ни: клеврет бо твой есмь и братии твоея пророков и соблюдающих словеса книги сея: Богу поклонися.

10 И глагола ми: не запечатлей словес пророчествия книги сея: яко время близ есть.

11 Обидяй да обидит еще, и скверный да осквернится еще: и праведный правду да творит еще: и святый да святится еще.

12 И се, гряду скоро, и мзда моя со мною, воздати коемуждо по делом его.

13 Аз есмь алфа и омега, начаток и конец, первый и последний.

14 Блажени творящии заповеди его, да будет область им на древо животное, и враты внидут во град.

15 Вне же пси и чародее, и любодее и убийцы, и идолослужителе и всяк любяй и творяй лжу.

16 Аз Иисус послах ангела моего засвидетелствовати вам сия в церквах. Аз есмь корень и род давидов, и звезда утренняя и денница.

17 И Дух и невеста глаголют: прииди, и слышяй да глаголет: прииди. И жаждяй да приидет, и хотяй да приимет воду животную туне.

18 Сосвидетелствую бо всякому слышащему словеса пророчества книги сея: аще кто приложит к сим, наложит Бог на него язв написанных в книзе сей:

19 и аще кто отимет от словес книги пророчествия сего, отимет Бог часть его от книги животныя, и от града святаго, и написанных в книзе сей.

20 Глаголет свидетелствуяй сия: ей, гряду скоро: аминь. Ей, гряди Господи Иисусе.

21 Благодать Господа нашего Иисуса Христа со всеми вами. Аминь.